ثلاث ضربات قاضيه تلقاها الشيخ طلال

2009-11-18


لست خبير أو متابع جيد للرياضه المحلية فقد طلقتها بالثلاث منذ عام 1998 وأكتفي حاليا بمتابعة ريال مدريد وبرشلونه، ولكن كان لي نقاش اليوم مع صديق رياضي ومتابع للشأن الرياضي المحلي وبين لي أن الشيخ طلال تلقى ثلاث ضربات قاضية خلال إسبوع واحد أنهت حياته الرياضية.


الضربه الأول – أمس الثلاثاء (خارج الهيئة): أيدت محكمة الاستئناف أمس الأول، برئاسة المستشار عادل بورسلي، حكم محكمة أول درجة برفض الدعوى المرفوعة من الشيخ طلال الفهد بطلب إلغاء قرار رئيس الهيئة العامة للشباب والرياضة بإقالته من منصب نائب مدير الهيئة العامة للشباب والرياضة، كما رفضت المحكمة طلبه بالتعويض عن الأضرار التي لحقته من جراء قرار إقالته، ويعني رفض المحكمة للدعوى سلامة قرار رئيس الهيئة استنادا إلى قانون الرياضة الجديد الذي يحظر الجمع بين رئاسة الأندية والعمل الحكومي. وعقب صدور حكم محكمة الاستئناف برفض دعوى الشيخ طلال الفهد قال محاميه عبدالله المدخي إنه سيطعن على الحكم أمام محكمة التمييز لإلغاء حكم محكمة الاستئناف.


الضربه الثانيه (خارج النادي): حل مجلس إدارة نادي القادسية.


الضربه الثالثه (خارج الإتحاد): الإتحاد الدولي لا يعترف بالإنتخابات التي أجرتها أندية التكتل والتي اسفرت عن فوز الشيخ طلال برئاسة الإتحاد .

وحسب ما نقل لي بأن قانون الأنديه لا يسمح لأي عضو في مجلس الإدارة تم تنحيته أو إستقال أن يترشح مره أخرى لمجلس إدارة النادي أو الإتحاد.

وعليه فإن الشيخ طلال سوف يكون خارج مجال كرة القدم إلى الأبد.

هل سوف يسكت عن هذا ... بالتاكيد لا ... شراح يسوي ... راح يسوي أشياء وايد ... شنو ... راح نشوف
--
ملاحظه: تفاصيل أخرى بينتها كتعليق في التعليقات

10 التعليقات:

بلا رجعة ان شاء الله
والفال لأخوه

غير معرف يقول...

اخوي الله يهداك لا تروج اشاعات علينا ترا مو ناقصين طال عمرك وامس على ذمة جعفر اللى فقناة العدالة يقول الفيفا مطرشين كتاب يرفضون فيه حل الانديةويعترفون بالشيخ طلال رئيس للاتحاد
ومتوقع الاعلان عن الكتاب اليوم اثناء الدوام الرسمي للوزارة

وشكرا

Faisal يقول...

الفيفا يطالب الحكومة بعدم التدخل في الرياضة، هذا كلام جاسم أشكناني في القبس بعد إيقاف النشاط الرياضي في 2007، والحين الحكومة (الهيئة) تحل الأندية الرياضية.

ما يبيلها واحد يتابع الرياضة علشان يحل اللغز الخطير.

قوانين الرياضة وجدت لإبعاد طلال الفهد عن الرياضة، والترفع بالطرف الثاني (مرزوق الغانم وشلته)، وهذا شي ما يخفى على أحد، إلا إذا كان واحد قاعد يستعبط ولا شي فهذا ما يشوف شر !!

ليش نركز على إبعاد طلال الفهد من الرياضة؟ ليش ما نركز على الرفع من المستوى الرياضي؟ ليش ما نركز على قوانين تفيد الرياضة مثل قانون الإحتراف (اللي موجود ضمن قانون 2007) وقانون الإستثمار (اللي موجود ضمن قانون 2007)؟

هل إذا طلال الفهد قرر بأنه لن يطبق مادة من قانون يتكون من سبع مواد يجب أن يبعد عن الرياضة ويحاكم ؟ والذي يعطل خمسة مواد من قانون يتكون من سبعة مواد يجب تكريمه ووصف أعماله بالبطولية ؟

إذا كنت تدافعون عن القوانين الدستورية فحياكم الله، ولكن المشكلة إنكم تدافعون عن القوانين اللي تخدم مصالحكم وبس يا مرزوق، وهالشي إذا خفى على الناس اللي يكرهون اسم (فهد الأحمد) سواء كان صح ولا غلط، فما يخفى على كل واحد يتابع الرياضة.

شنو راح نستفيد من قانون الفصل في المناصب الرياضية؟ السعدون في السبعينات كان عضو في نادي كاظمة ورئيس الإتحاد وعضو في مجلس الأمة ومع ذلك كانت كرة القدم من أحسن ما يمكن وهو اللي أعد المنتخب اللي فاز بكأس آسيا وتأهل حق كاس العالم !!

صوت الكويت يقول...

الأخ فيصل

الكلام إلي قلته يمكن أتفق معاك في بعضه ويمكن أختلف معاك البعض الآخر

ولكن أعتقد الشيخ طلال ما عرف يلعبها صح أو ان قرار حل الانديه ما كان يتوقعه.

حسب ما وصلتني من معلومات ان رئيس هيئه الشباب والأعضاء ذهبوا إلى وزير الشؤون وعرضوا عليه إما حل الأندية أو قبول إستقالتهم

الشي الثاني أن الشيخ طلال أغلق تلفونه لمدة اكثر من يومين - من يوم الجمعية العمومية الأولى وذلك لأنه تم إخباره بأن المراجع العليا بالبلد سوف تطلب حضورة إليها وأمره بالموافقه على 14 نادي في الجمعية العمومية

الشيء الثالث على الأقل 4 أنديه أو أكثر من أندية التكتل كانت ترغب بالتصويت على 14 نادي ولكن لخوفهم أو لعلمهم بان وجودهم مرتبط بالشيخ طلال وخوفهم من حصول مفاجآت تكون في صالح الشيخ طلال غيروا رايهم وصوتوا ضد 14 نادي

الشيء الرابع

المفاجاة كانت بحل النديه يوم السبت وكان إعتقاد أندية التكتل أن الهيئه لا تستطيع ان تحل الأنديه يوم العطله الرسميه
في الحقيقة يوم السبت ليس بوم عطله رسميه أنما عطله للراحه حسب ما تعرف به والعطله الرسميه بالكويت هي يوم الجمعة فقط

الكلام إلي قلته للتوضيح فقط وليس لدخول بجدال منو الصح ومنو الخطأ

تحياتي

أهل شرق يقول...

علشان يعرف الكل قوة القانون لي تطبق

Faisal يقول...

النقاط الثلاث الأولى كلها بلا أدلة، وأعتبرها تشويشات وليس توضيحات.

ليش ما توضح لي نقاط الإختلاف بيني وبينك، يمكن نوصل لنتيجة تفيدنا وتفتح عيونا على أشياء يديدة ؟

اللي أشوفه إن هالموضوع اللي انت كاتبه كله للشماته فقط، وهو بالأساس كلام دواوين محد يقدر يثبته !! أما إذا كان قصدك إظهار الحقائق للناس، فجان كتبت عن الطرفين.

مشكلة اللي يكره الشخص ويتبع ذلك بكره كل شي يسويه (سواء صح أو غلط) !!

صوت الكويت يقول...

Faisal

ليش أكره الشيخ طلال
هذا ولد الشيخ فهد الأحمد وجده الشيخ أحمد الجابر وبالنهاية من ذرية مبارك

تذكر إني قلت في نهاية المقال إنه ما راح يسكت وراح يسوي شي وهو وعد وقال عطوني شهرين ... وصدقني ما وعد عبث.. وراح تشوف المفاجاة


نقطة الخلاف إلي معاك إن آنا صدري وسيع وإنته العكس

إنطر شوي وراح تشوف إنه كل إلي في الرياضة مجرد يهال (أطفال)

قلت لك آنا مطلق الرياضة الكويتية بالثلاث وبسبة هاليهال إلي إستلموا الرياضه

Faisal يقول...

أنا اللي أشوفه إن الناس يكرهون شي في باسمه فهد الأحمد، هالكلام مو يعني إني أنا من مؤيدينهم، بس أكيد إني ما أكره أحد من اسمه أبوه !!

اهو اللي قاله عطوني شهرين وأحل مشكلة الرياضة.

وما قال إن راح تشوفون شي بعد شهرين.

الحين نقطة الخلاف صارت بيني وبينك للهذا السبب !! عقب ما كتبت لك وبينت لك الأسباب اللي معارضين فيها الناس القوانين غير العادلة، الحين صارت هذي نقطة الخلاف بيني وبينك !!

Fahad يقول...

والله يا اخوان انا اقول لا طلال الفهد ولا مرزوق الغانم ياتون بناس جدد غير محسوبه لاحد وتستلم الرياضه كلنا نذكر سنه 86 يوم الفيفا علق عضويه الكويت واحلوا اداره الاتحاد وجاء خالد المخلد وجاب معاه كاس الخليج بالبحرين وهو على راس مجلس الاداره وباستعداد سريع للمنتخب خلال اسبوعو ليش يبنا الكاس بمده استعداد بسيطه لان النفوس كانت صافيه مافي تكتلات ما في محسوبيات نفس صافيه تهمها الرياضه وبس مو صراع على الكراسي . الله يرحم ذاك الزمان اللي الناس تفكر في المصلحه العامه مو المصلحه الشخصيه.
وتقبلوا تحياتي

صوت الكويت يقول...

Fahad

والله أتفق معاك
ما أرده من طلال إلا مرزوق

إييبون ناس تشتغل للمصلحه العامه وشريفه ... مو ناس يلعبون بالحكام والاتحادات

خالص التحيه

 
 
 

تم إفتتاح المدونة بتاريخ 5 يوليو 2009