! أمي قالت

٢٠١٠-٠٩-٠٣


أمّي قَالت :

يمَّه أرضك
يمَّه أرضك
لا تبيع لو عُوْد يابس
عُوْد أَصْفر
من يبيع ذَرَّة رَمل
يمَّه باكر .. باع أَكثر
يمَّه هذي الأرض .. أرضك
هذي نَبْضِك
هذي أَقْدارك .. وحَظِّك
خَلّ جفْنِك دُوْم يسْهَر
الوطن مهو قصيده
تِنْكِتِب في قلب دفتر
الوطن يا وليدي .. أكبر
الوطن يا وليدي كلمه
تختصر ماضي وحاضر
تختصر أحلام باكر
الوطن .. مَوَّال أَخْضر
الوطن .. أيام حِلْوه
الوطن .. أيام عَسْرَه
بيت وذكرى
شمس وقمرا
شوق دافي
حب دايم .. في عيون الكِلّ يكبر
الوطن يا وليدي .. ناسِك
يمَّه ناسِك
عِزْوتِك .. وحْبَال راسك
يمَّه لا يذْبَل حَمَاسِك
خَلّ مواعيد الفَرَح
تنْكِتِبْ بعْيون باسِك
خَلّ جَبيْن الشمس .. يا وليدي
مداسِك
يمَّه لا تبكي قَهَر
لو يكون الضّيْم داسِك
يمَّه يا شمعة بَلَدْنا
أنتَ يا وليدي سَنَدْنا
يمَّه وايد زيْن ساسك
أمي قالت .. والصدى ردَّدْ وراها
يمَّه أرضك
يمَّه أرضك
يَعْني عِرْضك

14 التعليقات:

غير معرف يقول...

خوش اغنية لفرقة الاخوة البحرينية

ردتنا عشرين سنة قري

ebreeq يقول...

قصيده جميلة جدا

شكرا من القلب


بس اذا تسمح عندي تعليق على جزء فيها
"حبال راسك" بدلها ب"عروق راسك"

جذي يمكن أقوى دلاله


والمعنى في بطن الشاعر:)

قصيدة حلوووووة

والله يعطيك العافية

basees@bloggspot.com يقول...

أسلوب بسيط إنما فعّال في توصيل المضمون إلى الجميع

YusuF.AsKR يقول...

من روائع القصيد بالقافيه والمعنى والتعبير

لا هـنـت

(:

اقصوصه يقول...

رمضان كريم :)

أهل شرق يقول...

تقبل الله طاعتكم
وعيدكم مبارك

صوت الكويت يقول...

غير معرف

حياك الله .. رجعتك شباب يعني:)

صوت الكويت يقول...

ebreeq

المعنى في بطن الشاعر بالضبط

تقبل الله طاعتك وعيدك مبارك :)

صوت الكويت يقول...

كشـتات

الله يعافيك وعيدك مبارك

صوت الكويت يقول...

Basees


حياك الله وتقبل الله طاعتك وعيدك مبارك

صوت الكويت يقول...

أبو غرايم

حياك الله يا الحبيب وتقبل الله طاعتك وعيدك مبارك

صوت الكويت يقول...

اقصوصه

عساج من العايدين والفايزين وعيدج مبارك

صوت الكويت يقول...

أهل شرق

هلا بالغالي وعيدك مبارك وعساك من العايدين

 
 
 

Powered By Blogger

تم إفتتاح المدونة بتاريخ 5 يوليو 2009