رفيجنا عينه حااااره

٢٠٠٩-١٠-١٣

مشكلة الأشخاص إلي عينهم حاره وما ترحم إنهم ما يذكرون الله إذا فز قلبهم على شيء. وطبعا الشخص إلي ما مر عليه واحد عينه حاره ما يقدر يتصور الضرر إلي ممكن أن يقع عليه من معرفة واحد عينه حاره.


للأسف عندنا صديق عينه مو بس حاره إلا يطلع منها شرار، وما يثنيها إذا يت عينه على شي حلو إييبه الأرض. وقمنا نخش عنه كل شي زين وحلو، وهو طبعا عارف نفسه ويعترف بهذي الصفة الشيطانية !!!


صديقنا الأقشر له من المواقف التي لا يمكن أن ننساها، مواقف قويه لأبعد الحدود وسوف أذكر منها أخطرها وأطرفها:
كنا قبل عدة سنوات في زيارة إلى القاهرة وكان صاحبنا الأقشر معانا بالسفر وكنا قاعدين في لوبي الفندق نشرب قهوة، مر علينا ولد صغير جميل، شكله ولد نعمه. الأقشر بو عين حاره ناداه قاله شسمك ومن ولده، رد عليه الولد وقاله إسمه وإنه ولد القنصل السعودي في القاهرة. راح الولد وإلتفت علينا الأقشر وقال " بل حلو وولد نعمه وأبوه دبلوماسي" قلناله أذكر الله لا تضيع الولد ، ما رد علينا
بعد تقريبا 4 أيام قرينا بالجريدة إن القنصل السعودي انحرفت سيارته وسقطت بالنيل ومعاه زوجته وولده وماتوا جميعا.


أما أطرف القصص فهي
كنا في الدوانية ودخل علينا صديق من زمان ما شفناه، سلم وقعد ولسوء حظه يم الأقشر، طالعه الأقشر وقاله بشنو تصبغ شعرك، رد عليه المسكين أنا ما أصبغ، قاله الأقشر "بل ولا شيبه براسك" بعد كم يوم شفته إلا حايشته ثعلبه برأسه ومطيره أجزاء من شعره.

في النهاية سر العين الحاره ما اعرفه ولا أعتقد إنها تدخل من ضمن باب الحسد، أعتقد إهي شي أكبر وأسرع، ولي يعرف معلومات عن سر العين الحاره الرجاء تزويدنا بها.



10 التعليقات:

غير معرف يقول...

العين الحاره ما يطفيها الا صلاة الميت على الشخص الي عينه حاره وهالشي معروف من زمان :)
والمفروض الشخص الي عارف ان عينه حاره يخلي الناس تصلي عليه صلاة الميت عشان يسلمون من شره ويرتاح من كلام الناس عنه .

Khaled Mahdi يقول...

موضوع عسل ... الظاهر راح نصلي على نص الديرة :)))))

الدســتور يقول...

الله يفكنا منهم

عثماني يقول...

لا يحوشك

يا خوي اذا تعرف واحد من هالنوعية وخر عنه

المشكلة انهم ما يفرقون بين صاحب والا عدو

:)

صوت الكويت يقول...

غير معرف
من صجك، رفيجنا هذا يبيله صلاة جنازه بالحرم يالله نيب راسه

صوت الكويت يقول...

Khaled Mahdi
:)
إذا نص الديره زين!!!
خوفك أكثر

صوت الكويت يقول...

أبو الدســتور
آمين وبالذات رفيجنا

صوت الكويت يقول...

عثماني
والله إبتلشنا فيه... وعندي سالفه أقوى بس أخاف أقولها تقعدون أيام تسبون فيه

غير معرف يقول...

خل نلعب معاه لعبة تحدي لقوة عيونه

خلوه يحضر جلسة مجلس الأمة ولما يشوف مسلم البراك يصارخ خل يعطيه وحده ونشوف النتيجة !

صوت الكويت يقول...

غير معرف
والله يخليه يبنبع

 
 
 

Powered By Blogger

تم إفتتاح المدونة بتاريخ 5 يوليو 2009