آنا وولد عمي كلبونا جماعه 3- نقابة العاملين

2010-02-14

بصراحه فرحان إنَ في إجازه طويله قادمه خلال هذا الشهر .. أسافر شوي وأبعد عن الجو الممل في الكويت .. آنا أحب البحر وأحب الحداق وفي أي إجازه أروح مكان تعودت إني أروح له أجد فيه الخلوه والراحه .. ودي على طول في إجازات طويله والشركه ما ينخاف عليها من الإجازات مادام الأمور الماليه بالشركه جيده والبركه موجوده ...
-
ولد عمي إلي رجع من السفر مادري شناوي عليه .. تصرفاته من رجع مريبه ، وقاعد يتدخل بشؤون الشركه بطريقه مو مريحه .. قبل كم يوم وزع مكافآت على بعض إدارات الشركه بطريقه غريبه .. شكله يبي يحرجني جدام الموظفيين ... بصراحه أحرجني شوي بس الناس تنسى .. بس الخوف إنه يستمر في توزيع المكافآت على باجي الإدارات .. وهني راح يحرجني عدل لأن ما عندي إستعداد أن أنافسه بهذا الموضوع .. بصراحه صعبه يطلع الدينار مني.
-
آنا توني خالص من مشاكل نقابة العاملين بالشركه مع المدير التنفيذي بالشركه ومساعدينه .. نقابة العاملين ما تخلينا نرتاح كل ساعه طالعين بمشكله ، ومو قادر شلون أضبطهم .. طلباتهم كثيره وكل واحد يدور مصلحته ومصلحة ربعه ومو هامتهم الشركه وشلون نقدر نتعاون علشان ننميها ونطورها .. طبعا ما ألومهم لأن عيالنه إلي ماسكين الإدارات التنفيذيه بالشركة ضعاف وما ينشد الظهر فيهم وإذا زفيت أحد منهم زعل أبوه علي .. آآآآه بس لو عندي كم سبع من العايله أعتمد عليه شان والله أخلي نقابة العاملين مثل الحنطور كلما ألشطه بالسوط يتحرك وإذا ما لشطته تنَح في مكانه.
-
الحين آنا أنتظر المفاجآة القادمه من ولد عمي .. شراح يسوي وبخاصه إنه بدا يخلي ربعه يكتبون عنه ويمدحونه .. بس ما ينخاف علي .. آنا قوي وفطين ونبيه .. قدرت على إلي أقوى منه ما قدر عليه وراح تشوفون شراح أسوي.
-
-
نهاية الجزء الثالث ... يتبع
أكمل الجزء الرابع بعد إجازة المولد النبوي والعيد الوطني يكون شوي ريحت وفكرت ودبرت !؟

9 التعليقات:

عين بغزي يقول...

هذي الغمندا :)
شي طيب

متابع

نمووول يقول...
أزال المؤلف هذا التعليق.
نمووول يقول...

شوف اخوي صوت الكويت انت مبين عليك فطين بس شوي جعص اذا تبي نصيحتي فل ايدك وخل الموظفين يستناسون شوي شان ما ياكلك ولد عمك وتقعد تتحسف ..

على كل حال انت و ولد عمك تنيازون وانا وغيري ما نقدر نتدخل لاننا (مو اصحاب الحلال) مووو ..

متابع ..

غير معرف يقول...

سافر وأستانس ولابالبال أنت تحمد ربك إن عندك مجلس إدارة نقابة لاهي بحساب أرباحه وأعضاء جمعية عمومية قوم ماكاري ماعندهم إلاالتحلطم وبس .. لوتوصي عليهم مريان يقدر يقودهم لين ترجع لنا بالسلامة وتجدد نشاطك وأهديك من قصيدة الشريف بركات:
من نم لك نم بك ولا فيـه تشكيـك
وأليـاه قـد أزرى رفيـقـك ورزاك
عندك حكا فينا وعندي حكـا فيـك
وأصبحت كارهنـا وحنـا كرهنـاك
سياسة بريطانية بس المهم لاتنسى صوغة مرزوقة ومريان والجماعة خابرك بالسفر تشق الكيس .
مرقابي

صوت الكويت يقول...

عين بغزي

إيييه .. هذي الغمندا :)

صوت الكويت يقول...

نمووول

جرب وتدخل .. شفايدة ولد أخوي

صوت الكويت يقول...

مرقابي

من وين لي كيس علشان أشقه

تره ما نالني من الطيب نصيب .. آآخ بس لو مسوي قبل مثل ما سوى ولد عمي أو مثل ما سوى أخوي العود .. بس ياالله عيالي فيهم البركه يسوون إلي ما قدر أبوهم يسويه

bo bader يقول...

متابعين باعجاب

تحياتي لك ولعيال أخوك :)

صوت الكويت يقول...

bo bader


الله يحييك .. يوصل السلام إنشاء الله ..

 
 
 

تم إفتتاح المدونة بتاريخ 5 يوليو 2009