آنا وولد عمي كلبونا جماعه

٢٠١٠-٠٢-١١

إتصل ولد عمي وقال إنشاء الله راجع الكويت بعد يومين .. رديت عليه وآنا بصراحه مو فرحان بردته وقلت له حياك الله وراح أكون أول من يستقبلك بالمطار .. بصراحه قمت أفكر وأقول بيني وبين نفسي "شيايبه هذا .. صارلنا كم سنه مفتكين منه" ..
بعد يومين رحت المطار ومعاي إخواني وبقية عيال العمام والربع وكم واحد رازين ويوهم معانا .. وطبعا حضر معانا عياله الحلوييييين "يا ثقل طينتهم".

وصلت الطياره وبديت أحضر بقلبي الكلمات إلي راح أستقبله فيها ومع تحديد قوة الإبتسامه إلي راح ترافق الكلام والترحيب الثقيل على قلبي.

تلاقينا وتلاقت عيني بعينه وقمنا إنتخازز .. بصراحه حسيت إنه عينه يطلع منها شرار .. تخرع . في هاللحظه حسيت كأني آنا معاه فقط في قاعة الاستقبال .. حسيت اني ما أقدر استمر بالإمخازز .. ما أقدر على عيونه .. حسيت إني ضعيف .. ومالي عاده أحس إني ضعيف .

الحمد لله على السلامه ويا هلا ومرحبا بولد العم الغالي (هين غالي) .. كانت هذي الكلمات جزء بسيط من كلمات الترحيب إلي حضَرتها .. باقي الكلام إبلعتها عينه إلي للحين تخزني وتطالعني من فوق لتحت (ليكون بس مو عاجبه). .. فجأه فتح إيده وبرَز واحد من أصابع إيده اليمين "للعلم صبعه بحجم الخياره الراهيه" .. شان ينهد علي بالكلام .. "إنت ما تقولي شفيك على عيالي .. محد منهم تارس عينك .. رزَزت عيالك وعيال إخوانك وخليت عيالي"

بسم الله الرحمن الرحيم ... عسى ماشر ... شكله ياي بشره ... الله يستر .
رديت عليه بسرعه " ما يصير خاطرك إلا طيب "

نهاية الجزء الأول .. يتبع

13 التعليقات:

عين بغزي يقول...

غيرة اولاد العم مشكلة



متابع

a8lam7oora يقول...

واي يما لو آنا مكانك والله ماروح له المطار طار ولا وقع من بعد إذنك طبعا , بعدين إنت مو مكلوف بعياله وين اخوانه ومرته ما يرززون اليهال:(

الدم مايصير مايه على قولة اخوانا المصريين
ابن عمي عضيدي ...بعدين عفوا شكو عياله بجريرة اباهم!!!
عذرا على التطفل

غير معرف يقول...

اسمحلي أكون حقاني هالمرة .. ولد عمك عيز منك بعد رزة الصبع عطاك نقزة ولحقها بالثانية بس شكلك رافع الجامة ومطول على المسجل تسمع سي دي هبان مريان ومزوقة اللي مشوشين عليك تفكيرك وقمت ماتسمع غير صوتهم.
أنصحك تسمع أوبرا عايدة ورقصة البجع لعل وعسى يصفى فكرك والله يوفقك لما فيه الخير لك ولأبن عمك وجميع أبناء العائلة وإلا ترى ياكلونكم لحم ويقطونكم عظم.

غير معرف يقول...

عفوا نسيت أعرف نفسي مرقابي

Eng_Q8 يقول...

حلوه :)

صوت الكويت يقول...

عين بغزي

صح الغيره مشكله .. ولكن الأصعب اهمال وعدم السؤال عن عيال العم وتهميشهم

صوت الكويت يقول...

a8lam7oora
في شي مهم لازم تسوينه .. غيري الموجه حيل علشان تكونين في احداث القصه ..

ردا على سؤالج .. قصبن علي اروح المطار .. بعدين ولد عمي هذا متزوج اختي .!!!!

صوت الكويت يقول...

MSMAAR

صح الدم ما يصير ميه .. اهو عضيدي بصراحه اشك

مافي تطفل بس عدل الموجه شوي!!!

صوت الكويت يقول...

مرقابي

ولد عمي فيه حره علي .. وياي الحين يبي يطلع بصورة البطل .. المشكله انه عارف نقطة ضعفي وهي البخل وقاعد يضرب على هالوتر .. وبعد اهو منقهر من عيال اخوي الي رزيتهم وشلون عطيتهم مناصب عليا بشركتنا وكشت في ولده الي ما اشتهيه

بس اسمحلي ما ارضى على مرزوقه انا ماني عارف ليش مو عاجبتك

صوت الكويت يقول...

Eng_Q8

تعجبني :)

bo bader يقول...

قوية !!

بس ما راح أعلق لأني ما أتكلم بالسياسة

خطرة وايد يا خوي

تحياتي

صوت الكويت يقول...

bo bader

سياسه أي سياسه يا خوي .. الموضوع ما يتعدى كونه قصه قصيره أو قصة مسلسل عربي يمكن يحصل في أي بيت

علامك الله يهدييييييك

 
 
 

Powered By Blogger

تم إفتتاح المدونة بتاريخ 5 يوليو 2009